മദ്യപാനത്തോടുള്ള അടിമത്തവും വിവാഹമോചനവും ഉള്‍പ്പെടെയുള്ള തന്റെ ജീവിതത്തിലെ നിരവധി വ്യക്തിപരമായ വെല്ലുവിളികളെക്കുറിച്ച് തുറന്നുപറഞ്ഞ് ഐപിഎല്‍ ചരിത്രത്തിലെ ഏറ്റവും മികച്ച ബൗളര്‍മാരില്‍ ഒരാളായ യുസ്വേന്ദ്ര ചാഹല്‍. അടുത്തിടെ ഫസ്റ്റ് ക്ലാസ് ക്രിക്കറ്റില്‍ നിന്ന് വിരമിച്ച ഇന്ത്യന്‍ ക്രിക്കറ്റ് താരം യുസ്വേന്ദ്ര ചാഹല്‍, മദ്യപാന അടിമത്തത്തില്‍ നിന്ന് മുക്തി നേടാനായി പുനരധിവാസ കേന്ദ്രത്തില്‍ ചികിത്സ തേടേണ്ടി വന്ന അനുഭവമാണ് വെളിപ്പെടുത്തിയത്.
'കഴിഞ്ഞ വര്‍ഷത്തെ കൗണ്ടി ക്രിക്കറ്റിന് ശേഷം… മദ്യപാനം എല്ലാ അതിരുകളും ലംഘിച്ചിരുന്നു. അങ്ങനെയാണ് ഞാന്‍ ഒരു റിഹാബ് സെന്ററില്‍ പ്രവേശിക്കുന്നതും 26 ദിവസം അവിടെ കഴിയുന്നതും. എന്നാല്‍ ഇപ്പോള്‍ അത് എങ്ങനെ കൈകാര്യം ചെയ്യണമെന്ന് എനിക്കറിയാം' -ചാഹല്‍ പറഞ്ഞു. 'ആ തീരുമാനം എന്റെ വ്യക്തിജീവിതത്തില്‍ വലിയ മാറ്റമുണ്ടാക്കി. എന്റെ പക്വത വര്‍ധിച്ചു. എന്റെ വികാരങ്ങള്‍ ഇപ്പോള്‍ നിയന്ത്രണവിധേയമാണ്. കഴിഞ്ഞ ഐപിഎല്ലില്‍, എന്റെ ശരീരത്തിന് വീണ്ടും 30 വയസ്സ് പ്രായം തോന്നിച്ചു - ജിം വര്‍ക്കുകളും ഫീല്‍ഡിംഗ് പരിശീലനവുമൊക്കെ കൃത്യമായി ചെയ്യാന്‍ എനിക്ക് സാധിച്ചു' -അദ്ദേഹം പറഞ്ഞു. ജീവിതത്തിലെ ഈ വിഷമകരമായ ഘട്ടത്തെ അതിജീവിക്കാന്‍ കുടുംബവും സുഹൃത്തുക്കളുമാണ് തന്നെ സഹായിച്ചതെന്ന് ഈ 36-കാരനായ ലെഗ് സ്പിന്നര്‍ കൂട്ടിച്ചേര്‍ത്തു. 'എന്റെ ഏറ്റവും നല്ല സുഹൃത്തും കുടുംബവും ആ സമയത്ത് എനിക്കൊപ്പം ഉണ്ടായിരുന്നു' -ചാഹല്‍ പറഞ്ഞു.
2011-ല്‍ ഐപിഎല്ലിലേക്ക് പ്രവേശിച്ച കാലത്താണ് മദ്യപാന പ്രശ്‌നങ്ങള്‍ ആരംഭിച്ചതെന്നും എന്നാല്‍ വിവാഹമോചനത്തിന് ശേഷം അത് കൂടുതല്‍ വഷളാവുകയായിരുന്നുവെന്നും ചാഹല്‍ പറഞ്ഞു. എന്നിരുന്നാലും, ആ ആസക്തിയെ അതിജീവിച്ച ശേഷം താന്‍ ഇപ്പോള്‍ കൂടുതല്‍ സന്തോഷകരമായ അവസ്ഥയിലാണെന്ന് അദ്ദേഹം കൂട്ടിച്ചേര്‍ത്തു. 'തുടക്കത്തില്‍ ഞാന്‍ ചെറുപ്പമായിരുന്നു, പാര്‍ട്ടികളൊക്കെ ഉണ്ടായിരുന്നു. 2011-ലാണ് ഞാന്‍ എന്റെ ആദ്യ ഐപിഎല്‍ കളിക്കുന്നത്. ദക്ഷിണാഫ്രിക്കന്‍ താരം എബി ഡിവില്ലിയേഴ്‌സ് ഒരിക്കല്‍ എന്നോട് പറഞ്ഞിട്ടുണ്ട്, 'ജീവിതത്തില്‍ സന്തുലിതാവസ്ഥയാണ് പ്രധാനം' എന്ന്. കേള്‍ക്കുമ്പോള്‍ അത് എളുപ്പമാണെന്ന് തോന്നുമെങ്കിലും അതത്ര എളുപ്പമല്ല' -അദ്ദേഹം പറഞ്ഞു.
വിവാഹമോചനത്തിന് ശേഷം കാര്യങ്ങള്‍ പരിധിവിട്ടു, എന്റെ മാനസികാവസ്ഥയും അത്ര നല്ലതായിരുന്നില്ല. ഞാന്‍ ആ വഴിയില്‍ തന്നെ മുന്നോട്ട് പോയാല്‍ ഞാന്‍ ഏറ്റവും കൂടുതല്‍ സ്‌നേഹിക്കുന്ന ക്രിക്കറ്റ് എന്ന കാര്യത്തെ തന്നെ അത് നശിപ്പിക്കുമെന്ന് ഞാന്‍ തിരിച്ചറിഞ്ഞു. അങ്ങനെ ഞാന്‍ അതിന് ഒരന്ത്യം കുറിച്ചു, ഇപ്പോള്‍ ഞാന്‍ വളരെ സന്തോഷകരവും മികച്ചതുമായ ഒരു അവസ്ഥയിലാണ്' -ചാഹല്‍ പറഞ്ഞു.
തന്റെ വ്യക്തിജീവിതത്തിലെ അസ്വസ്ഥതകളെക്കുറിച്ച് സംസാരിക്കവെ, ഒരു പ്രമുഖ വ്യക്തിയെന്ന നിലയില്‍ ആളുകള്‍ക്ക് തന്റെ സ്വകാര്യ കാര്യങ്ങളില്‍ അഭിപ്രായം പറയാന്‍ എളുപ്പത്തില്‍ അവസരം ലഭിക്കുന്നുണ്ടെന്ന് ചാഹല്‍ പറഞ്ഞു. 'നിങ്ങള്‍ ഒരു പ്രമുഖ വ്യക്തിയാകുമ്പോള്‍, നിങ്ങളുടെ ജീവിതത്തില്‍ സംഭവിക്കുന്ന എല്ലാ കാര്യങ്ങളും ആളുകള്‍ക്ക് അഭിപ്രായം പറയാനുള്ള ക്ഷണമായി മാറും. എനിക്ക് വലിയ വിഷമം തോന്നി, ഒരുപാട് പ്രയാസങ്ങള്‍ അനുഭവിക്കേണ്ടി വന്നു' -അദ്ദേഹം പറഞ്ഞു. 'ഞാന്‍ അനിരുദ്ധ് സാറിനോട് (മുന്‍ ബിസിസിഐ ട്രഷറര്‍ അനിരുദ്ധ് ചൗധരി) സംസാരിച്ച് ഒരു ബ്രേക്ക് വേണമെന്ന് ആവശ്യപ്പെട്ടു, അദ്ദേഹം എന്നെ വളരെയധികം പിന്തുണച്ചു. ഒടുവില്‍ ഞാന്‍ ചിന്തിച്ചു, 'എത്രനാള്‍ ഞാന്‍ ഈ ഭാരവും പേറി നടക്കും?' അതിനിടയില്‍ എനിക്ക് ആശങ്കകളും ഭയാനകമായ പരിഭ്രാന്തിയും ഉണ്ടാകാന്‍ തുടങ്ങി. ആകുലത ഉണ്ടാകുമ്പോള്‍ ഹൃദയമിടിപ്പ് വര്‍ധിക്കും. പാനിക് അറ്റാക്ക് വരുമ്പോള്‍ എന്റെ മുഖം ചുരുങ്ങുമായിരുന്നു. എനിക്ക് സംസാരിക്കാന്‍ പോലും കഴിഞ്ഞിരുന്നില്ല; എന്റെ ചുണ്ടുകള്‍ മുറുകുകയും ഒരു വശത്തേക്ക് വലിഞ്ഞുപോവുകയും ചെയ്യും, അതോടെ എനിക്ക് എന്തോ കുഴപ്പമുണ്ടെന്ന് ആളുകള്‍ക്ക് മനസ്സിലാകുമായിരുന്നു' -ചാഹല്‍ വ്യക്തമാക്കി.
content highlights: 'Crossed All Limits After Divorce…': Yuzvendra Chahal Opens Up About Alcohol Addiction & Mental Health